សហរដ្ឋអាមេរិក៖ បើតាមប្រភពពីមន្រ្តីអាមេរិកម្នាក់បានឱ្យដឹងថា ប្រធានាធិបតីអាមេរិក Joe Biden នឹងជួបជជែកតាមទូរសព្ទជាមួយនាយករដ្ឋមន្ត្រីអ៊ីស្រាអែល Benjamin Netanyahu នៅថ្ងៃព្រហស្បតិ៍ ទី០៤ ខែមេសានេះ ដែលជាការជួបជជែកជាលើកដំបូងបង្អស់រវាងមេដឹកនាំប្រទេសទាំងពីរ បន្ទាប់ពីមានហេតុការណ៍នៃការវាយប្រហារពីសំណាក់អ៊ីស្រាអែល ដែលបណ្ដាលឱ្យបុគ្គលិកអង្គការមនុស្សធម៌ ៧នាក់ស្លាប់បាត់បង់ជីវិត។ 

សេតវិមានអាមេរិកធ្លាប់បញ្ជាក់ថា លោក Biden មានការខឹងសម្បារ និងខកចិត្តយ៉ាងខ្លាំងចំពោះការវាយប្រហារនេះ ប៉ុន្តែយ៉ាងណាមិញហេតុការណ៍នេះពុំបានធ្វើឱ្យសហរដ្ឋអាមេរិកផ្លាស់ប្តូរជំហរនៃការគាំទ្ររបស់ខ្លួនលើអ៊ីស្រាអែល នៅក្នុងបញ្ហាសង្គ្រាមក្នុងតំបន់ហ្គាហ្សានេះឡើយ។ ប្រភពដដែលបញ្ជាក់ថា ប្រធានាធិបតីអាមេរិកទំន​​ងជានឹងនាំមកនូវតម្រូវការសម្រាប់ការការពារកាន់តែប្រសើរឡើងសម្រាប់បុគ្គលិកមនុស្សធម៌ ជាពិសេសក្នុងប្រតិបត្តិការនាំយកអាហារ និងជំនួយទៅកាន់ជនស៊ីវិលក្នុងតំបន់ហ្គាហ្សា។ 

គួរឱ្យដឹងថា ថ្នាក់់ដឹកនាំរបស់សហរដ្ឋអាមេរិក និងអ៊ីស្រាអែល បានជួបប្រជុំគ្នាលើប្រព័ន្ធអនឡាញកាលពីថ្ងៃចន្ទ ដើម្បីពិភាក្សាអំពីការគំរាមកំហែងរបស់អ៊ីស្រាអែលក្នុងការបើកការវាយលុកយ៉ាងទូលំទូលាយនៅក្នុងទីក្រុង Rafah ភាគខាងត្បូងនៃ Gaza ដែលជាមូលដ្ឋានចុងក្រោយនៃការភៀសខ្លួននៅប្រជាជនប៉ាឡេស្ទីនជាង ១លាននាក់។ ភាគីទាំងពីរគ្រោងនឹងពិភាក្សាអំពីបញ្ហានេះផ្ទាល់ នៅក្នុងជំនួបតំណាងប្រទេសទាំងពីរនៅសប្តាហ៍ក្រោយ។ 

ដោយឡែក បើតាមអគ្គលេខាធិការព័ត៌មាននៃសេតវិមានសហរដ្ឋអាមេរិក លោកស្រី Karine Jean-Pierre បានថ្លែងប្រាប់អ្នកសារព័ត៌មានថា លោកប្រធានាធិបតីអាមេរិក Joe Biden ចង់ឱ្យមានការបើកការស៊ើបអង្កេតយ៉ាងឆាប់រហ័សតាមដែលអាចធ្វើបាន ទៅលើការវាយប្រហារតាមអាកាសរបស់អ៊ីស្រាអែលលើក្បួនរថយន្តជំនួយស្បៀងអាហារ ដែលបណ្ដាលឱ្យបុគ្គលិក និងក្រុមការងារ ៧នាក់បាត់បង់ជីវិត៕